CM-in football champion lawmpui

Chief minister Lal Thanhawla chuan, "Infiamna hmunhma sorkarin a siamte infiammite'n an hman ṭangkai thiam a, a enkawltu lamin a ngaihna an hriat bawk chuan sang takah kan thleng thei a ni," a ti.

Nimin tlai khan CM hian tun hnaia Assam Rifles CAPF Under-19 NE Zone Football Tournament, Shillong-a khelh zawh taka champion, Mizoram mipa team leh pathumna ni ta Mizoram hmeichhe team-te lawmpuina 46th Assam Rifles hmuna neih a hmanpui a, player-te hnenah lawmman a hlan.

Hawla chuan, "Assam Rifles hian Mizote ṭhian ṭha nih an tling hle a, hetiang thil an buaipui hi an tilawmawm takzet a ni," a ti a, Mizo ṭhalai a tam thei ang sipaia ṭang tura a duhsak thu a sawi bawk.

23 Sector AR-a commander Brig. MS Mokha chuan team an dinna kawnga Mizoram Football Association (MFA) nen an thawhhona a ṭhat thu a sawi a, team-te inpekna fakin India ram pum intihsiakna an hmachhawn turah duhsakna a hlan.

MFA president leh Health minister ni bawk Lal Thanzara bakah MFA ho­norary secretary Lalnghinglova Hmar-te pawhin thu an sawi bawk a ni.