MNF-in Bawng talh khap chungchangah Remna thuthlung a ṭha tawkah an ngai

MNF ṭhalai president Lalrinawma, MLA chuan, India rama bawng talh khap chungchang chu MNF leh India sorkarin remna thuthlung, Memorandum of Settlement (MoS) an ziahin a huam thu a sawi a, "Thuthlung pêla hmalakna a awm chuan MNF ṭhalaite'n a tawp thlengin kan do let ang," a ti.

MNYF President hian nimin khan Mizo Hnam Rûnah thuthar thehdarhtute a kâwm a; "Bawng talh khap chungchangah, June 30, 1996-a MNF leh India sorkarin MoS an ziah, Section 4.3 (II)-a 'Mizo sakhua leh khawtlang nuna chîn ṭhan (religious or social practices of Mizos) humhalhna dan kan lo ziah kha keini chuan a him tâwkah kan ngai," a ti a; MoS pela hmalakna chu an dodal tur thu a sawi.

Lalrinawma chuan, MNF ṭhalaite chuan ram leh hnam tana nunna hlan ta, Mizo hnam martarte an an ngaisangin an ngaihlu tak zet tih sawiin, "MNF-in Ex-Mizo National Army Association (Ex-MNA) hmalaknaa hnam tana martarte ruhro an khâwm ṭhin hi kan ngaihluin ropui kan ti," a ti.

MNYF President chuan, ram leh hnam tana martarte'n an thisen hmanga an lo ziah hnan tawh Mizo hnam din chhuahna thuthlung chu kengkawha vawng nung zel turin Mizo ṭhalaite a sáwm a; "Ram leh hnam tana zalenna suala thî leh thau pawlha beitu zawng zawngte ram leh hnam tana hna thawkho leh tura MNF-a lo haw khawm leh turin kan insawm a ni," a ti.

Political party-ah tuna hruaitu ni laite lo chu tun dinhmunah Mizote'n political party leader an nei chuang lo nia sawiin, "Kan party awmna a hran avangin kan ngaihdan pawh a inang lo ang a, ram an hruaina kawngah duhthusam lo lai leh ngaihdan inang lo laite pawh a awm ang," a ti a; insawisel pawhin, political leader-te hming sawi chhuahnaah ṭawngkam mawi leh hawihhâwm zawk hmang turin social media hmangtute a ngen a ni.