Martarte Lungphun champha hmang

Congress party ṭhalaite chuan nimin khan Sesawng rama Martarte Lungphun champha vawi 20-na an hmang a; an president Vanlalawmpuii Chawngthu, MLA-in thu sawiin, "Ram leh hnam hmangaihna nen ṭhalaite'n politics kan khelh a ngai," a ti.

MPYCC president Vanlalawmpuii chuan, Mizo hnam tana martarte an ngaihsan thu leh an zah thu sawiin, "Mahni nunna hlu tak senga ram leh hnam an lo hmangaih hi hlu tak a ni," a ti a; martarte hlutna chu ṭhangtharte hnenah zirtir zel a ngaih thu a sawi.

Vanlalawmpuii Chawngthu chuan, chief minister Lal Thanhawla chu hnamah a chiang hle niin a sawi a; Mizo ṭhalaite chu Mizo nationalism-ah an chian thar a ngaih thu a sawi bawk.

CTI, Sesawnga Martarte Lungphun hi June 7, 1997-ah CM Lal Thanhawla'n a hawng a, rambuai lai, kum 1966-1986 chhunga nunna chánte hming 1,300 chuang ziah luh tawh a ni.