Dan kengkawh ngam kan mamawh - Duhoma

ZNP President Lal-duhoma chuan, Mizoramin dan ṭha ringawt ni lo, khauh taka dan kengkawh ngam sorkar a mamawh tih a sawi a, "Kan ramah hian dan eng emaw zat kenkawh mang loh leh a awm tih pawh kan hriat mang loh a awm ta nual mai,” a ti.

Nimina ZNP inkhawm-ah thu sawiin Lalduhoma chuan, "Hlemhletna leh sualna langsar tak tak hlamzuih hlen ta a tam. Rev. Chanchinmawia thih dan chhui chhuak zo lo leh duh lo sorkar kan nei a. Hman deuha rangkachak quintal chanve zet man pawh kha a thâwm hriat zui a ni ta lo. Aizawl Municipal Corporation hnuaiah hnam dang sumdawng registration nei 124 an awm a, Mizoram sorkar hnuaiah 347 an awm bawk," a ti a; ILP kenkawh kawngah sorkar a dul sâwt hle niin a sawi.

Kawng hrang hrangah sorkarin mipui a hum zo ta lo nia sawiin Duhoma chuan, "Sorkar dik leh chak kan mamawh ang bawkin, opposition huai-sen, a thu a zira sorkar thlawp emaw dodal emaw ngam, House chhung leh páwna sorkar khalh ngil thei kan mamawh," a ti.

ZNP President chuan, Mizoram sorkar chu nawr nun chawo ngai nia sawiin, "Sorkar nawr nun chawp ngai leh ui dawih zawk ang maia opposition mei khup hi paihin, party sorkar ni lo, mipui sorkar, mi dikte lawmman pea misualte hrem ngam sorkar din turin i inbuatsaih ang u,” a ti bawk.