School fee 50% aia tam lak a nih loh nan MZP-in CM hnenah rawtna an thlen

MZP hruaitute chuan April 29, Nilaini khan chief minister Zoramthanga chu a pisaah an kâwm a; inkhàrkhip a nih avangin zirlaite'n school fee-ah harsatna an tâwk tih sawiin, sikul luh hunah fee a chanve aia sang lak a nih loh nan hma la turin an ngen.

MZP hian Chief Minister hnenah hian, thla khat chuang inkhârkhip a nih tawh avangin chhungkaw tam takin eizawnna an chhunzawm thei lo tih sawiin, sikul hrang hranga fee (monthly/hostel fee)-ah, fee an lak ṭhin pangngai zatve (50%) aia tam lo lak a nih theih nan hma la turin an ngen. CM Zoramthanga chuan, zirlaite leh sikul neitute'n harsatna an tawh lohna turin sorkarin a ṭul angin ruahmanna a siam ang a, chak zawka an bawhzui tur thu a lo hrilh.

Mizoram páwna tangkhang mek, a bikin hmarchhak state ni loa tangkhangte zinga dinhmun harsa zualte hnenah sorkarin awlsam zawka chhawmdawlna a pek theih nan center remchang hmun hrang hrangah siam turin MZP hruaitute chuan an ngen a; CM chuan, sorkarin a ṭul angin hma a lak zel dawn thu a sawi.

MZP hruaitute chuan, CADC huam chhungah Zo hnahthlakte'n thil lei chung­changah harsatna an tâwk tih sawiin, hriatthiam harsa an tih thu an sawi a; Chief Minister chuan, harsatna an tawh zui loh nan sorkarin hma a lak tur thuin a chháng.

Hripui laka invenna atana Mizoram ramri vên chung­changah, police leh tlawm­ngai pawl/task force-te ṭha taka an thawhho theihna tur kaihhruaina mumal siam ṭul an tih thu leh Covid-19 donaa hmalakna hrang hranga an ngaihdante MZP hruaitute chuan an thlen bawk.