Vijay Goel-a'n Governor leh CM a kâwm

Zan khat riaka Mizorama rawn zin, Union minister of state for Youth Affairs & Sports Vijay Goel chuan Thawhṭanni zan khan Raj Bhavan-ah Governor Lt.Gen. Nirbhay Sharma a kâwm a; tlaiah chief minister Lal Thanhawla chu a banglaah a kâwm bawk.

Governor chuan, Mizoram chu ram nuam leh ralmuang tak a nih thute leh Mizo khawtlang nuna thil chhin-chhiah tlakte a hrilh a, "NGO hrang hrang leh kohhrante hmalakna avangin boruak muanawm tak hnuaiah inthlanna neih ṭhin a ni," a ti.

Infiamna lama Mizoram hmasawnna leh hlawhtlinna a neihte sawiin Larsap chuan, "Mizoramin infiamnaah theihna sang tak a nei a, a theihnate hai chhuak zel turin theih-tawp chhuah a ngai a ni," a ti a; Mizoram tana theihtawp chhuahpui turin a ngen.

Union Minister Vijay Goel chuan, Prime Minister-in infiamna lam tihhmasawn a tum a, sport budget pawh tihpun a nih thu sawiin, "Infiamna tihhmasawn zelna tur-in thingtlang aṭanga ṭanin, theihna leh thiamna neite zawn chhuah zel a ni dawn," a ti.

Mizoram chu nuam a tih thu sawiin, inthlanna felfai taka neih a ni ṭhin te, faina, khawtlang nunte chu fakawm a tih thu leh, India ram pum entawn ni thei se a duh thu a sawi.

Chief Minister nen an inkawmnaah CM Lal Thanhawla pawhin infiamna leh thil danga Mizoram hmasawnnate leh hlawhtlinnate a lo hrilh a; infiamna lama Mizoram hmasawn zel nan theihtawp chhuahpui turin a ngen.

Lal Thanhawla chuan, Tata Trusts leh Mizoram sorkar thawhhona hmangin Mizo naupangte'n Germany-ah football an zir mek thu te, Mizoramah badminton tihhmasawn nan tun hnaiah India chief coach P Gopichand-a'n Aizawl a rawn tlawh thu te, India cricketer lâr Surinder Amarnath pawhin Mizoram tlawhin Mizoramah cricket academy a din a duh thu a hrilh thute Union Minister a hrilh a ni.

Vijay Goel chuan, Mizoramin football-ah hlawhtlinna a hmuhte chu a lawmpui thu a sawi a; football leh infiamna dangah Mizoramin hma a sâwn zel theih nan a theih ang anga ṭanpui a tum thu a sawi bawk.