Leimin vangin in pathum ṭhiah a ni

June 26, Thawhṭanni zan thimhlim aṭanga ruahsûr vangin Suangpuilawnah lei a min a, in pathum chu luah ngam loha a awm zui avangin nimin khan khawtlangin an ṭhiat.

In ṭhiahte chu Lalduhawma, C Rovela leh Lalrinsangate Ralte te in a ni a, in ṭhiah zawh a nih hnuah V/C-in in hmun thar an pekah an in tur relsak nghal a ni. Hmun dangah pawh lei min a awm nual a, Suangpuilawn leh Vanbawng inkar kawnga lei minin kawngpui a tiping a, PWD-in nimin khan lirthei kal theihin an thianfai nghal.

Seling-Champhai kawng, National Highway pawh Tuivawl lui bula lei minin a hnawh ping a, thenfai hna thawh zui zel a ni. Leimin hian a chung tlanga a min ṭanna hmuna 132 kV line thlunna tower chu a khawih chêt ṭan avang-in harsatna dang a thleng a; hemi chungchang hi PWD hotute'n Power & Electricity department hotute an hrilh tawh. Kawng chhak lama lei tla leh thei tura lang chu nawr thlak a nih chuan electric ban lian ding chu a tlak thlak mai theih dawn avangin an duh anga khawih zui theih a ni lo.

Aizawl-Thenzawl-Lunglei World Bank road, Ṭhiak khaw bula lei min lian takin kawngpui a hnawh chu rang zawka thenfai a nih theih nan PWD hotute'n Hitachi khawl dang pakhat an ngaihtuah belh a, naktuk aṭangin chak zawka hna thawh hman tura beisei a ni.

World Bank kawng ping hi a sir tawn tawnah Hitachi leh JCB hmanga then zui zel a ni a; kawng thlangah Horticulture farm leh mimal ram a awm avangin kawng thlaangah lei nawr liam mai theih a ni lo a, tipper hmanga phurh chhuah zel a ngaih avangin kawng tipingtu lei paih hna a chak thei lo a; tun kar tawp chhunga siam tlang hman an tum a ni.