Niminah sample 22 endik a ni

Zoram Medical College (ZMC) Covid-19 Testing Laboratory-ah nimin khan mi 22-te swab sample endik a ni a, he thu ziah lai hian result hriat hman a ni lo. Sample test zinga pakhat chu vawi khat endikna (endik thar) a ni a, a dang 21 chu Nilainia endik tawh, fimkhur thilah uluk zawka endik nawn leh a ni.

State Referral Hospital-ZMC Covid-19 Bulletin nimin tlaia chhuak chuan State Referral Hospital ICU-a Covid-19 vei enkawl mek chuan hma a sawn zel tih a tarlang a, "Nimin (Nilaini) aṭang khan oxygen pek a ngai tawh lo. A khum aṭangin a tho kâng peih tawh a, khawsik pawh a reh tawh bawk," a ti.

April 29, Nilaini tlai dar 5 leh nimin tlai dar 5 inkarah Mizorama lut tur mi 521 chu ramria screening point hrang hrangah enfiah an ni a, enfiah tawh zawng zawng chu mi 72,729 an tling tawh. Nimin khan laboratory-a endik turin mi pakhat swab sample lak a ni a, chu nen chuan Mizorama swab sample endik tawh zawng zawng chu 180 a ni. Covid-19 vei rinhlelh thilah State Referral Hospital-ah mi 30 dah luh tawh a ni a, chu'ng zinga mi 29 chu an chhuak leh tawh a ni.