Budget her danglam a ngai mai thei - LADC CEM

Lai Autonomous District Council (LADC) chief executive member (CEM) T Zakunga chuan, Covid-19 vangin LADC budget her danglam a ngaih mai theih thu nimina amah kâwmtu Lawngtlai District MJA member-te a hrilh.

T Zakunga chuan, mipuite chhuan­chhama an awm loh nan buhfai quintal 1,000 tal lei khawm tuma hmalak mek a nih thu sawiin, "Lawngtlai West bialtu MLA H Biakzauva'n theihtawp min chhuahpui a, Supply Minister pawh biak a ni tawh," a ti a; Supply Minister leh Lawngtlai East MLA-te'n hma an lâkpui avangin lawmawm an tih thu a sawi.

Inkhàrkhip vangin LADC budget session neih theih a nih loh thu sawiin CEM chuan, "Session neih theih hun tur hriat ni lo mah se, ramin harsatna lian tak a tawh mek avangin LADC budget pawh hri léng leh a nghawng awm thei lam hawiin a theih ang anga her rem dan ngaihtuah a ṭul," a ti.

T Zakunga chuan, pawl, kohhran leh mimalin Covid-19 vanga CEM Relief Fund-a pawisa an chhûn luh chu cheng nuai 50 chuang a ni tawh tih sawiin, "A hman dan tur ngaihtuahtu committee hran din a ni a, anni'n ruahmanna an siam anga hman a ni," a ti a; Relief Fund thawhtu zawng zawng chungah an lawm thu a sawi.

Lawngtlai MJA-te chuan, CEM Relief Fund chu pawisa faia sem chhuah loh dan ngaihtuah ni se an duh thu CEM hnenah an thlen a ni.