MAMSOL-in sawhthing a leiah ZPM lawm

Zoram People's Move­ment (ZPM) party chuan, Covid-19 vanga inkhàrkhip mek karah kuthnathawktute'n sawh­thing hralhnaah harsatna an tawh lohna tura Mizoram Agriculture Marketing Solution (MAMSOL)-in tunlaia sawhthing an lei mek chu lawmawm an tih thu an tarlang.

ZPM thuchhuah tarlan danin, MAMSOL-in tunlai hian Ṭinghmun, Sakawrdai, Sialhâwk, Khanpui, Chawngtlai, Khawzawl, Lungtan leh North Khawbung khuaahte sawhthing kg. khat Rs. 30 zelin an lei mek a ni.

ZPM chuan, an pawl din tirh aṭanga an thupui lian tak chu - thingtlanga kut hnathawktute hamṭhatna zinga langsar ber pakhat chu sawhthing hralhna chungchang a nih thu sawiin, "Kum 2018 inthlana ZPM auhla ber pawh sorkarin sawh­thing Rs. 50-in a lei ang, tih a ni," an ti a; MAMSOL hmalakna chu ZPM policy tihhlawhtlinnaa an ngaih thu an sawi.

Inthlan dawn laia sawhthing kg. khat Rs. 50-a leisak an tum thu an sawi laiin, political party dang chuan thil theih loh a nih thu an sawi nasa tih sawin ZPM chuan, "Tunah MAMSOL-in kuthnathawktute sawh­thing thar hlép neia hralh leh tura Rs. 30-a an lei theih chuan sorkarin kut hnathawktute hamṭhatna tura hlêp nei loa hralh leh tura Rs. 50-a lei chu a theih a ni tih a lang chiang hle a ni," an ti.

ZPM chuan, MAMSOL chu thliar bik leh duhsak bik nei loa kut hnathawktute sawhthing thar leisak zel tura ngenin duhsakna an hlan a ni.