Assam leh Mizoram aiawhte an inbia ; Vawi 2/1-ah ramri chinfel a theih loh - Chama ; Chinfel dan tur kan hmu ngei ang - Atul Bora

Mizoram leh Assam ramri chungchangah state pahnih minister-te nimin khan Aijal Club-ah an inbia a, joint press statement an siam nghal. Assam team leader Atul Bora, Border Development & Protection minister chuan, "Ramria harsatna awm hi a chinfel dan kan hmu chhuak ngei ang," a ti a; Mizoram team leader Lalchamliana, Home minister chuan, ramri buai chu vawi hnih khata chinfel mai theih a ni lo tih a sawi.

Atul Bora chuan, inbe turin Mizorama ṭum hnih an kalna a nih thu sawiin, "Kan kal hmasak ṭumin thil tam tak kan sawi a, joint press statement kan siam. Vawiinah pawh a ṭha zawngin thil a kal. Ramria harsatna awmte chinfel tumin vawi tam tak meeting a ni a, DC level-ah pawh an inbe nasa. Ramria harsatna awmte hmu chhuakin, chinfel dan tur kan hmu chhuak ngei ang," a ti.

Assam Minister chuan, Mizoram CM leh a thawhpuite ramri chingfel tura an hmalaknaah fakin, "Assam CM Himanta Biswa Sharma pawh ramri buai chingfel tura a hmalaknaah fakawm ka ti tak zet. Assam sorkar hian state dang nena ramri buai a neihte chingfel turin theihtawp a chhuah a ni," a ti a; Assam CM kaihhruainain Arunachal Pradesh leh Meghalaya nena an ramri buai chinfel a nih tur thu a sawi.

Ramria Assam leh Mizoram dinna a inang lo a, inremna nei tur chuan ram hloh ṭhen a ngaih dawn avangin, state pahnihin ram an hloh ṭhen phal dawn leh dawn loh Vanglaini palai zawhna chhangin Atul Bora chuan, "State pahnih ngaihdan inang lo mah se, inbiakna leh inhriatthiamna hmangin a chinfel theih ang. Arunachal Pradesh leh Meghalaya nen pawh kan chingfel thei," a ti.

Assam leh Mizoram tana khawih phal loh (status quo)-a dah mek Inner Line Reserved Forest square metre 509 chhungah Assam-in hmasawnna hna a thawk reng nia Vanglaini palaiin a sawi chungchangah Bora chuan, Assam leh Mizoram sorkarin Forest Act-te an bawhchhe thei lo, tiin a chhang.

Vanglaini palaiin state pahnih chief minister-te inbiak hun tur a zawhna chu Assam Minister chuan, "An inbe thuaiin ka ring. Nikuma Aizawla kan inbiak hnu lawkah pawh state pahnih CM-te hian zanriahte kîlhoin an inbia a ni," a ti.

Home minister Lalchamliana chuan, sorkarin ramri chinfel dan tur a ngai pawimawh tak zet tih sawiin, "Buaina hi vawi leh khata chinfel ngawt theih a ni lo a, a bik takin ramri chungchanga buaina phei chu," a ti a; Assam-in Meghalaya leh Arunachal Pradesh nena ramri buai a neih pawh state pahnihin an duh dante an thlen hnu kum eng emaw zat hnuah chinfel theih chauh a nih thu a sawi.

Ramria buaina chu state pakhat chauh duh dana chinfel chi a ni lo tih sawiin Lalchamliana chuan, "Ramri chingfel tur chuan hloh chin leh hlâwkna chin neih a ngai. A nih loh chuan chinfel theih a ni lo. Ṭhutkhawm vawi hnih/khata chinfel mai mai theih a ni lo," a ti.

Mizoram sorkar agenda-a tel, Assam-in ramri buaina vanga Mizoram mite laka FIR a thehluhte hnuh kîr vek rawtna chungchanga meeting thutlukna Vanglaini palaiin a zawhna chhangin Chama chuan, "FIR hi police lamin an withdraw ngawt theih a ni tawh lo a, judiciary lam a thleng tawh," a ti a; ṭhutkhawm leh hunah an sawiho leh tur thu a sawi.

State pahnih inbiaknaah hian Atul Bora hi Housing & Urban Affairs minister Ashok Singhal, Border Development & Protection secretary GD Tripathi leh official ṭhenkhatte'n an ṭawiawm a; Lalchamliana hi IPR minister Lalruatkima, Home secretary H Lalengmawia leh Home department hotu dangte'n an ṭawiawm a ni.

Mizoram leh Assam minister-te inbiak chungchang hi CM Zoramthanga chuan social media-ah tarlangin, remna leh muanna awm theihna tura hmalakna chu ropui a tih thu a sawi a, "Hmabak tam tak la awmte Pathian kuta innghat chungin Mizoram sorkar chuan hma a la zel ang. Mizoram leh a chhunga cheng Mizote tan rah ṭha chhuah mawlh teh se. Mizoram sorkar chuan Mizoram tan theihtawp a chhuah zel dawn," a ti.

MIZORAM LEH ASSAM JOINT STATEMENT
• August 5, 2021-a inremna ding zel rawh se
• Ramria harsatna a awm lohna atan ramri hnaih DC-te thla hnih danah vawi khat tal inbe rawh se
• Ramria kut hnathawktute'n an huan leh loa hna an thawk tur tihbuai loh ni rawh se
• October 2022 chhungin Guwahati-ah inbiak ni leh rawh se