CM-in Jeremy Lalrinnunga a lawmpui

Chief minister Zoram­thanga chuan Common­wealth Games 2022-a gold medal chawi chhuaktu Jeremy Lalrinnunga, Ainawn Veng lawmpuina hun nimin khan CMO conference hall-ah a buatsaih. CM chuan, Jeremy Lalrinnunga'n hma a sawn zel a beisei thu a sawi.

Chief Minister chuan, tun hmain infiamnaa hlawh­tlingte Mizoram sorkarin a chawimawi tawh ṭhin tih sawiin, "Kan ṭawng miin an huat loah, sorkarin chawi­mawi zui zel duh mah ila, anmahni inthunun theih lohnain a hnûk hniam nasa ṭhin. Tun hnuah chuan tiang hi a ni tawh lo a, hlawhtlinna changte hi nun entawn tlak tak tak an ni vek tawh," a ti.

Sorkarin Jeremy Lalrinnunga chawimawina hun buatsaih duh viau mahse hun a awm loh avangin a buatsaih thei rih lo tih sawiin Zoramthanga chuan, "Sorkarin fumfê taka a lawmna leh thil dang a tih ngei ka beisei," a ti a; Mizoram sorkarin Jeremy-a a chhuan thu leh a lawmpui tak zet thu a sawi.

Lawmpuina inkhawm kaihruai­tu SYS minister Robert Romawia Royte chuan, Jeremy Lalrin­nunga hnena sorkarin a pek tur chungchang sawiin, "Kalphung fel tak a awm a, a dawng tur dik tak hnenah a hun takah pek a ni ang," a ti.

Jeremy Lalrinnunga pawhin thu sawiin, gold medal a lâk chu India chauh ni lo, Mizoram tan a nih thu a sawi a, "Sorkarin min ṭanpui nasa a, ka lawm tak zet," a ti a; a kal zelna turah sorkarin a thlàwp zel a beisei thu a sawi.

Jeremy Lalrinnunga hian a thawhna India Army-a an hotute'n an koh avangin nimin khan Mizoram a chhuahsan leh nghal a ni.