YMA-in ruihhlo a do leh dawn

YMA Central Executive Committee (CEC) August 8, Thawhṭanni zana ṭhukhawm chuan Central YMA hnuaiah Ruihhlo Do Pawl din an rél a, ruahmanna siam turin CYMA Kumpuan Sub-Committee an ruat.

Central YMA hruaitute CYMA Committee Room-a ṭhukhawm chuan, August 5, 2022 zana Aizawla YMA branch office bearer-te intawhkhawm an thlir lêt a; YMA branch hruaitute thusawi leh duh dante thlirin, "Ngun taka sawiho a nih hnuah CYMA hnuaiah Ruihhlo Do Pawl din leh ngei ni se," an ti.

CYMA hnuaia Ruihhlo Do Pawl din dan tur leh a kaihhnawih thil chi hrang hrangte duang turin CYMA Kumpuan Committee an ruat a; Kumpuan Commi­ttee ruahmanna chu CYMA office bearer-te'n an thlirho leh ang a, chumi hnuah CEC pawmpui turin pharh leh a ni ang.

August 5, 2022 zana Aizawla YMA branch OB-te inhmuhkhawmnaah Aizawla YMA hruaitute chuan, YMA kalphung atana ṭha an tihte leh ruihhlo do dan tura ṭha an tihte mi eng emaw zatin an sawi a; sawitu tam ber chuan CYMA kaihhruaina hnuaiah ruihhlo dotu tur siam ṭha an ti a, bawhzui zel dan tur CYMA kutah an dah.

Mizorama ruihhlo hluar tial tial leh ruihhlo do chungchangah CYMA office bearer-te chuan May 4, 2022 khan kohhran leh páwl hrang hrang aiawhte leh thuthar thehdarhtute sáwm khawmin an lo sawipui tawh bawk a; ruihhlo chungchanga Mizoram dinhmun thlirin, tun hma lama YMA-in ruihhlo a donaa chêt fuh tâwk lohna awm tawhte hre reng chungin YMA-in ruihhlo a do leh mai ṭha an tih thu an sawi hlawm a ni.

YMA CEC ṭhutkhawm hi CYMA president R Lalngheta'n a kaihruai a, general secretary Prof. Lalnuntluanga'n CYMA hmalaknate leh thil ṭul pawimawhte a tarlang. October 27, 2022-a Thingsulthliaha YMA Rorel Inkhawm vawi thumna neih tur chungchang te, September 14, 2022-a YMA Central Coordination Committee neih tur chungchangte an ngaihtuah bakah, YMA life member dilna 10 an pawm a ni.