Mat luia tla hmu; Tlawnga tla hmu lo
August 2, 2022 tlaia car nena Tlawng luia tla C Lalfakzuala (39) h/o Rebecca Lallawmzuali leh a fapa Malsawmkima (10) te chu nimin thleng khan hmuh an la ni lo a; August 6, Inrinni chhuna Mat luia tla VL Hmangaihzuala (15), Thenzawl Vengchhak ruang erawh chu nimin zing khan hmuh a ni.
Lalfakzuala te pafa hi Mizo kalphung anga khawtlang huapa ni sarih zawn a nih hnuah hmuh an nih loh avangin nimin tlai dar 3 khan khawtlang huapa zawn hnatlang chu tihtawp a ni a; hnatlang khàrna inkhawm hi an tlâkna, Sihhmui leh Lengpui inkara Tlawng lei bulah buatsaih a ni. Hortoki leh Bairabi lama tuitla zawngte'n khàrna hun an hmang bawk.
Tlawng lei bula hnatlang khârna inkhawm hi Central YMA vice president Lalhmachhuana'n kaihruaiin, Salvation Army CO Maj. J Liankhama'n hunserh a hmang a; CYMA president R Lalngheta bakah, chhungkaw aiawh, YMA Sihhmui Branch leh Chaltlang Lily Veng Branch aiawhte'n thu an sawi.
August 6, Inrinni chhuna Thenzawl leh Serchhip inkar Mat luia tla VL Hmangaihzuala ruang erawh chu a tlak aṭanga ni lina, nimin zing dar 7 vel khan hmuh a ni a, nimin vêk khan vûi a ni. VL Hmangaihzuala ruang hmu hmasatute chu Zodinmawia (22) leh Lalruata (22), Serchhip Darnam Veng ve ve an ni.