Mi hminga loan pûktu mi 3 lakah Champhai PS-ah FIR thehluh a ni

Hnahlan khuaa self help group (SHG) pangaa member mi 50-te chuan an hminga loan pûktu mi pathum - Lucas Thang­mangliana, PS Zatuanga leh Paulam­thang te lakah Champhai Police Station-ah first information report (FIR) an thehlut.

Thu dawn danin, Lucas Thangmangliana, PS Zatuanga leh Paulam­thang te hi March 2021 khan Hnahlan khuaah kalin, kut hnathawktute hamṭhatna tur sorkar laipuiin bank kaltlangin 'loan ṭha mi' a pe chhuak dawn niin an sawi.

Hnahlan mite an thlêm dan chu, mi 10 zel awmna SHG panga an din ang a, anni'n loan an buaipuisak ang. SHG member pakhatin Rs 1,60,000 zel an hmu thei dawn a, an buaipui manah Rs 40,000 zel an chang ve thung ang.

Hnahlan khuaah hian kut hnathawktute chuan SHG an din a, SHG pakhatah member 10 zel an awm. SHG pangate hming chuan October 22, 2021 khan mi pathumte chuan Mizoram Rural Bank-ah Rs 80,00,000 an pûk a ni. Mi pathumte chuan a tìrah SHG mem­ber-te hnenah hming an ziah man Rs 12,000 ṭheuh an pe a, a bak chu an pe zui tawh lo.

Lucas Thangmangliana, PS Zatuanga leh Paulamthang ten loan an pûk avangin April 2022 khan loan pûkna MRB aṭangin Hnahlana SHG pangate chuan ba ṭhìnna an dawng a; loan pûk pawisa an hmuh si loh avangin Champhai PS-ah FIR an thehlut ta a ni.

Champhai PS chuan FIR an dawn chu an bawhzui nghal a, inhnamhnawih nia hriat Paulamthang chu an man nghal a, mi dang pahnih - Lucas Thangmangliana leh PS Zatuanga te erawh chu an tlânbo avangin an la man thei lo.

Police-in an chhuina kal zelah mi pathum bakah hian inhnamhnawih dang mi pahnih - Tuangzapauva leh Jacob Thanglianchina te an man tawh.
Champhai police-te sawi danin, Lucas Thangmangliana, PS Zatuanga leh Paulamthang te hian Hnahlan khuaa mi 50-te hmingin MRB-ah loan cheng nuai 80 an pûk bakah, Champhai Bethel Veng, Champhai Vengthar leh Tuipuiral tlangdunga chhungkaw eng emaw zat hmingin loan an pûk bawk. Loan an pûk zawng zawng chu chhungkaw 1,250 vel hmingin cheng nuai 2,000 chuang a nia hriat a ni.

Lucas Thangmangliana hi Enforcement Directorate (ED) pawhin thubuai an lo siamsak tawh a, Money Laundering Act hmangin February 9, 2022 zan khan Champhaia a in an dap a, ina pawisa a kawl eng emaw zat an hrènsak. ED hian ni hnih chhung awm chilh mah se, Lucas Thangmangliana chu a haw loh avangin chhui zui turin Money Laundering Act hnuaiah thubuai an ziak lut a ni.