Ainawn Venga quarters a him tâwk lo

Land Revenue & Settlement (LRS) minister Lalruatkima chuan, nimin zing khan sorkar hotute nen Ainawn Venga sorkar in (quarters) hlui leh chênna tlak tawh lo nia sawite an tlawh. Quarters ṭhenkhat chu a him tâwk lo tih hmuh a ni.

Lalruatkima chuan, Ainawn Venga sorkar quarters luahtute'n August 8, Thawhṭanni khan Chief Minister an hmu tih sawiin, "An harsatnate a rang lama ngaihven chi nia CM-in a hriat avangin hmanhmawh takin min endiktir a, kan endikna report pawh CM hnenah thlen leh a ni ang," a ti.

LRS Minister chuan, Ainawn Veng LC leh mipui chu an veng hmasawn zel dan kalpui tura sorkarin hma a lak mek avangin sorkar hotute hnathawh tikhaihlak lo tur te, sorkar quarters nêk chêp zawnga hna thawk lo tur leh, veng dang aṭanga in sak tumte khap rih turin a chah.

Sorkar thuchhuah tarlan danin, Ainawn Vengah hian sorkar quarters 184 a awm mek a, type-I 88, type-II 56, type-III 24 leh type-IV 16 a ni. Phalna neia quarters luah chhungkua 125 leh phalna nei loa luah chhungkua 43 an awm a; quarters 10 chu a ruhrel him tâwk loh vanga luah dilna siam phal a ni tawh lo.

LRS Minister hi bialtu MLA Zothantluanga, Aizawl bawrhsap Dr Lalhriatzuali Ralte, LRS director K Laldingliana, LRS, GAD, PWD leh DMR hotute bakah, Ainawn Veng LC leh Quarters' Allottee Welfare hruaitute'n an ṭawiawm a ni.