Mizoram E.Roll aṭanga Bru 1,074 paih hi thil chhinchhiah tlâk a ni - MNF

MNF party chuan, Mizoram electoral roll aṭanga Bru voter 1,074 paih a ni tih sawiin, thil chhinchhiah tlak tak a nih thu an tarlang.

MNF thuchhuah chuan, "NGO Coordination Committee leh Mizo mipui duh dana Tripura-a awm mek Bru-te Mizoram electoral roll aṭanga voter 1,074 zet paih an ni hi thil chhinchhiah tlak, ram tan méllung pawimawh tak phunnaah kan ngai. Mizoram sorkar hmalakna chu chhuanawm kan ti a, hma a lakna zel turah sorkar chungah rinna kan nghat tlat a ni," a ti.

MNF tarlan danin, Tripura-a awm Bru, Mizoram electoral roll aṭanga paih tawhte chu - Hachhek bial aṭangin mi 791, Dampa bial aṭangin mi 48 leh Mamit bial aṭangin mi 235 an ni a; an vaiin mi 1,074 an ni.

Ministry of Home Affairs (MHA), Mizoram sorkar, Tripura sorkar leh Bru hruaitute'n Mizoram aṭanga Bru tlân thlate Tripura-a inbéngbel turin January 2020-ah inremna an ziak tih sawiin MNF chuan, "Inremna tihlawhtling tur hian hmalak mek zel a ni a, Tripura-a awm hlen tur Bru-te Mizoram electoral roll aṭanga paih hna thawh mek zel a ni," an ti a; chutih rualin, Tripura sorkar nen thawhho ngai a nih avang leh voter-te duh thlannaa tih ngai a nih avangin tih zung zung theih a ni lo tih an sawi.