TJ Manuna'n Ṭiau kama duty-te a tlawh

Champhai South bialtu MLA TJ Lalnuntluanga, minister of state chuan nimin khan Mizoram leh Myanmar inrìnaa task force duty-te leh Ṭiau kama duty post-te a tlawh a, hmalak zel dan tur a sawipui.

TJ Lalnuntluanga chuan, ramri depa chengte hnena lawmthu sawi tur leh mamawh angte enfiah tura tlawh a nih thu sawiin, "Ram ropui leh thil ti thei zawkte pawh an buai em em a, keini chenin hripui hian min tibuai. Hripui laka inven kawng­ah Mizoram sorkar nasa takin a inhmakhua a, hmun dang aia hmain lockdown kan puang a, airport leh ramri luhka hrang hrangte pawh khâr hmasa ber pawl kan ni a, hmun dangte awh em em task force-te din vat niin, an hmalakna hnuaiah kan la him zel a ni," a ti.

Minister chuan, thâ thlah loa duty ṭhinte fakawm a tih thu sawiin, "Harsatna awm palh thulh pawha rilru zau tak pu chunga ram leh hnam damna ngaihtuah reng chunga rinawm leh taima taka ṭan mar pát a ṭul. Hripui reh hnuah ei leh bâra intodelh tum a pawimawh," a ti a; hri léngin Mizoram a kiansan huna kal zel dan tur leh harsatna pumpelh dan turte ngaihtuah tel a pawimawh thu a sawi.

TJ Lalnuntluanga hian nimin zing khan Dilkawn leh Kelkang a tlawh bawk a; hmun hrang hrang a tlawhnaah hian Champhaia sorkar official-te'n an ṭawiawm a ni.