MTA-in taxi a thara thlâk theih an duh

Mizoram Taxi Association (MTA) chuan nimin khan R Dengṭhuama Hall-ah General Assembly vawi hnihna an hmang a, minister of state Robert Romawia Royte-in a hmanpui. MTA chuan, taxi-te a thara thlak theih an duh thu an tarlang.

Robert Romawia Royte chuan, taxi khalhtu rinawmte'n an taxi-a passenger-te thil theihnghilh a neitu hnena an kìr leh ṭhin chuan Mizote a tihmawi thu a sawi a, "Hnam dang leh chinchang hre lo zawkte an thil hriat loh hrilhfiah a, polite taka an kal duhna hmun hruai thlen hi thil ṭha leh pawimawh a ni. Taxi khalhtute'n sap ṭawng emaw, vai ṭawng emaw kan thiam vek lo a, ṭawng thiam loh vanga hnam dang phurh huphurh tur a ni lo," a ti.

Minister hian taxi khalhtute chu fit reng turin a chah a, kum tawp lam hun remchangah Fit Mizoram Taxi Cup buatsaih a rawt a ni.

MTA inkhawmpui hian resolution pahnih an siam a, "Mizoram sorkar hian taxi-te hi replace (motor thara thlâk) min phalsak rawh se," an ti. Inkhawmpuiah hian member 2,300 vel an tel a, taxi khalhtute pualin health check-up buatsaih nghal a ni.