Hindi zirtirtu hnam dang pahnih bàn phût

Mizo Hindi Zirlai Pawl (MHZP) chuan, CSS hnuaia Hindi zirtirtu atana DPC kaltlanga lak tawh, kum tam tak an thawh hnua bàn leh vek an nih avanga Hindi zirnain nasa taka a tuar chu pawi an tih thu an tarlang a; Hindi zirtirtu atana hnam dang pahnih lakte chu August 2022 chhunga bàntir an phût thu an puang.

MHZP chuan thuchhuah siamin, "Kum 10 chhung Hindi zirna leh puanzarnain ngaihthah a hlawh bakah, sorkarin tling leh tlaka a ngaih, DPC kaltlanga CSS Hindi teacher lak tawh, kum tam tak an thawh hnua bàn leh vek an nih avanga Hindi zirnain nasa taka a tawrh phah hi pawi kan ti hle," an ti a; chutih rualin, Zoramthanga kaihhruai sorkarin Samagra hnuaiah CSS Hindi teacher 806 a la leh tawh chu lawmawm an tih thu an tarlang.

CSS Hindi teacher lakah recruitment rules kalhin ram leilung fa ni lo, Mizo ṭawng thiam lo, trained nih vanga lak pahnih an awm avangin MHZP hruaitute chuan August 8, Thawhṭanni khan Chief Minister leh Education Minister an hmu a, hnam dang pahnihte chu tun August thla chhunga bàn turin an ngen a ni.