MIMA-in minimum wages chungchang CM leh LESDE Minister an sawipui

Mizoram Merchant Association (MIMA) hruaitute chuan nimin khan chief minister Zoramthanga leh Labour, Employment, Skill Development and Entrepreneurship (LESDE) minister Lalchhandama Ralte an hmu a; Shops and Establishment Acts hmanga sorkarin minimum wages hmantir a tum chungchang an sawipui.

Chief Minister an hmuhnaah MIMA hruaitute chuan, minimum wages chu Labour Law kalpuina tur nia sawiin, India ram state zawng zawngah dawrkaite-ah minimum wages hman a nih loh thu te, corporation lian, damdawi-in lian, company lian, industry lian, factory, adt. ah hman a nih thu an sawi a ni.

Minimum wages hman tura State Level Committee-in rate a ruahman chu India rama minimum wages rate-ah a san filawr thu leh hman chi-a an ngaih loh thu te, minimum wages hmangtu state dangtea sumdawng lian ho pawh mi pasarih thawk chinah association an din danin a phalsak hmangin an thawhnate chungah nawrh an huaihawt fo avangin an buai hle ṭhin thute an sawi bawk.

MIMA hruaitute chuan LESDE minister Lalchhandama Ralte pawh an hmu a; MIMA duh ber chu, India ram state dangte ang bawka dawrkai/proprietorship-a minimum wages hman loh a nih chu an thlen a ni. An sawiho hnuah, MIMA hruaitute leh LESDE department hotute'n sawiho leh se, chumi hnuah minister hoa sawiho leh turin thu an dah tih MIMA chuan an tarlang.