World Indigenous Peoples Day hmang

Zo Reunification Organisation (ZORO) General Headquarters chuan nimin khan MZP Conference Hall-ah International Day of World Indigenous Peoples an hmang a, Assembly deputy speaker Lalrinawma'n a hmanpui.

Lalrinawma chuan, Mizote dam khawchhuahna turin insuihkhâwm a ṭul tih sawiin, "Khawvelah hnam tlem apiang an ral zel a, an bet zel a ni tih history aṭangin kan hria. Zo fate hi kan insuihkhawm a, kan inhlâwmkhawm a pawimawh tak zet. Kan hnam tan a huhoa kan beih a ngai a ni," a ti.

ZORO president R Sangkawia chuan, Zo fate duh lo chung British-in an ṭhen darh tih sawiin, "Insuihkhawm leh kan duh a, kan dikna chanvo a ni. Hemi kan neih lêt leh hma chuan kan bei zel dawn a, kan hmanrua chu tharum thawh loin a ni ang," a ti a; "Insuihkhawm leh a, rorelna pakhat hnuaia awm a, khawvela hnam anga ding chhuak turin kan bei a ni," a ti bawk.

International Day of World Indigenous Peoples hmanna inkhawm hi ZORO vice president Lalmuanpuia Punte-in a kaihruai a, general secretary L Ramdinliana Renthlei-in an pawl hmalaknate a sawi a ni.