Covid-19 vanga thi mi pathum awm belh

August 8, Thawhṭanni khan Mizoramah Covid-19 vei mi 243 hmuh chhuah a ni. Nimin khan hripui vei dam tawh mi 172 chhuahtir an ni a, Covid-19 vanga thi mi pathum an awm belh.

Thawhṭannia Covid-19 positive hmuh thar mi 243-te chu mipa 108 leh hmeichhia 135 an ni a; ZMC leh Lunglei RT-PCR laboratory-a hmuh chhuah mi pahnih, TrueNAT hmanga hmuh mi pakhat leh RAT hmanga hmuh mi 240 niin, positivity rate 25.23% a tling.

August 8 zan dar 7:20 khan Amesh Kumar (22), Pandawnglui, Lawngtlai district chu hripui vangin Lunglei DCHC-ah a thi. Covid-19 vei a ni tih August 5 khan hmuh niin, DCHC-ah enkawl nghal a ni a, Malaria PF a vei bakah, natna dang nei tel a ni.

Thawhṭanni zan vêk dar 7:30 khan Zarzoliana (79), Saitual chu Saitual DCHC-ah a thi a, Covid-19 positive a ni tih August 2, 2022 khan hmuh chhuah a ni a, natna dang a neih hriat a ni lo tih sorkar thuchhuakin a tarlang.

R Zirchhunga (79), Lunglei Venglai pawh nimin zing dar 6:40 khan State Referral Hospital-ah hripui vangin a thi a; Covid-19 positive a ni tih July 27, 2022 khan hmuh chhuah niin, August 4 aṭangin SRH-ah enkawl a ni a, natna dang nei tel a ni.

IDSP record angin, Mizoramah Covid-19 vei 2,34,387 hmuh chhuah a ni tawh a, mipa 1,09,158 leh hmeichhia 1,25,229 an ni a, mipa aiin hmeichhia 16,071-in an tam zawk. Nimin tlai dar 5 thleng khan mi 2,32,633 (99.25%) chhuahtir an ni tawh a, mi 714 (0.30%) thi tawhin, enkawl mek mi 1,040 (0.45%) an awm.