KHAWTHLIR

MRB-in Jeremy-a Rs 5,00,000 hlan
Mizoram Rural Bank (MRB) chuan nimin khan an auditorium-ah Commonwealth Games 2022-a ritchàwia gold medal latu Jeremy Lalrinnunga an chawimawi. Jeremy Lalrinnunga hnenah hian MRB chairman V Jaya Chandra chuan lawmpuina Rs 5,00,000 leh thuchei a hlân a; MRB PUC Branch-in Pathian Lehkhabu Thianghlim an hlân bawk.

Thisen pe
KṬP, Chhinga Vengthlang Branch chuan an siver jubilee pualin nimin khan Synod Hospital tan thisen unit 35 an pe a, petute mipa 32 leh hmeichhia pathum an ni.

AR sawn chhuah dan tur bawhzui
Lok Sabha MP C Lalrosanga chuan nimin khan New Delhi-ah National Security advisor Ajit Doval a kâwm a, Aizawl khawpui lailí aṭanga Zokhawsanga Assam Rifles sawn chhuah leh Myanmar aṭanga Mizorama ráltlânte chhawmdawl chungchang leh thil pawimawh dangte a sawipui. MP thu thlente chu a lo en zui tur thu Ajit Doval chuan a lo hrilh niin sorkar thuchhuahin a tarlang.

Serampore tlawh
Minister of state TJ Lalnuntluanga chuan nimin khan Serampore College-a Mizo zirlai leh thawktute a tlawh a, William Carey-a pian champha, Carey's Day puala August 17-a thing phun hnatlang atan pawisa a pe. Serampore College-ah hian zirtirtu 12 zinga panga leh zirlai 160 vel zinga 40 vel chu Mizo an ni.

DC hoin thing phun
Aizawl DC pisa chuan nimin khan bawrhsap Dr Lalhriatzuali Ralte hoin Azadi Ka Amrit Mahotsav pualin Sawkawrhmuituai tlangah thing ṭiak 75 an phun a, Sihphir VC member-te'n an ṭawiawm. Bawrhsap hian Durtlanga hmeichhia ṭanpui ngaite ṭanpuina hmun One Stop Centre a tlawh bawk.