Property Tax-a sum hmuh aṭangin Ward tinah Rs. 9,00,000 pe dawn

Aizawl Municipal Corporation (AMC) Board of Councillors (BoC) chu nimin khan AMC session hall-ah an ṭhu a; Property Tax aṭanga chhiah hmuh aṭangin ward tinah a ṭul anga hna thawhna atan Rs. 9,00,000 ṭheuh pek an rel.

AMC BoC meeting hi mayor PC Lalhmingthanga'n a kaihruai a; councillor 19 zinga 18 an tel thei a, Lok Sabha MP CL Ruala pawhin AMC member a nih angin a telpui a ni.

AMC hian mipui aṭanga chhiah, Property Tax lak chu a petu mipui tan 80% hman March 2017 khan an lo rel tawh a; an thurel tawh angin, Property Tax aṭanga sum lut aṭangin AMC ward tinah Rs. 9,00,000 ṭheuh pek an rêl a ni.

Rs. 9,00,000 chu ward tina Ward Committee-te'n a hman dan tur an ngaihtuah ang a, an bial chhunga hmasawnna hna thawh nan hman a ni ang.

AMC meeting chuan, kum 2017-18 aṭangin AMC-in Aizawl khawpui chhunga motor parking fee, Ch. Chhunga Bus Terminal leh Ch. Saprawnga Truck Terminal-a parking fee aṭanga sum an hmuh zinga 80% chu AMC chhunga motor parking hmun tur leh lirthei stand-te siamna atan hman ni se, an ti.

Parking fee aṭanga sum lut zinga 80%, motor parking leh stand siam leh cheina atana hman rawtna motion hi Ward-IV councillor Laltlanzova Khiangte-in a pu lut a; lungrual taka pawm a ni.

Ch. Saprawnga Truck Terminal tuala parking fee khawn hna chu contractor-te hnena pek leh terminal building chu luah hawh theih tura buatsaih rawtna Ward-IV Councillor-in a thlen pawh pawm a ni.

AMC BoC chuan Aizawla leimin hlauhawm lai tarlanna map, (Landslide Hazard Map of AMC area) an pawm. Map hi Geo Hazard Internatioal siam a ni a, Aizawla leimin hlauhthawnawm lai leh hmun him laite tarlanna a ni. Building Regulations leh parking area siam rem ngaite an tidanglam a, parking fee rate thar eng emaw zat an pawm bawk.

Mayor PC Lalhmingthanga chuan, AMC aṭangin local council-te puala sum dah bik, Tax Devolution chu sem chhuah mek a nih thu a sawi a; hei hi kumin aṭanga tih ṭan a nih thu a sawi.