CADC sorkar ṭhiah phûtin kawng zawh

Chakma dis­trict-a MNF party chuan, Chakma Autonomoud District Council (CADC) ṭhyiah thuai phûtin nimin khan Chawngte-ah Protest Rally huaihawtin kawng an zawh a; memorandum an siam chu Governor leh Chief Minister hnena pek turin Chawngtea SDO (Civil) hnenah an thehlut bawk.

MNF party hian CADC-a thuneihna changtu Congress party kaih­­hruai sorkarin thlawptu a neih tam tawk tawh loh avangin CADC sorkar chu ṭhiah thuai an phût a; tun hnaia tui lian vanga harsatna tâwkte chhawmdawl kawngah sorkar hmalakna awm loa an hriat thu an tarlang. Kawngzawhnaah hian mi eng emaw zat an tel a ni.

Chakma district MNF president Rasik Mohan Chakma chuan, CADC sorkar pakuanaa chief executive member (CEM) Kali Kumar Tongchongya-a'n sorkarna khawp thlawptu a nei tawh lo tih sawiin, chuti chung chuan hun rei tak sorkarna chelhtir a ni tawh tih a sawi a; sorkar thlawptu tam tawk an awm tawh loh avangin sorkar chu ṭhiah thuai an phut tih a sawi.

RM Chakma chuan, CADC-a sorkar hotute chu kum li chhungin nasa takin eiruknaah an inhnamhnawih niin a sawi bawk a, "CADC-ah hotu an inthlak apiangin eirukna hmuh tur a awm a, mipuiin an tuar hle a ni," a ti.

Rashik Mohan Chak­ma sawi danin, Congress MDC ṭhenkhatin CEM an rin tâwk tawh loh avangin thlak an duh a, April 24, 2017-ah CADC-a executive member (EM) pali leh nihna pawimawh dang chelhtu Congress MDC dang pathum, an vaiin MDC pasarih chuan an nihna aṭanga bànna an thehlut a ni.

Kali Kumar Tong­chongya kaihhruai sorkar chu ṭhiah a ni lo a, a kal zel a; CADC sorkara thawk mi eng emaw kaisantir leh dah ngheh an awm bakah, thawktu dang eng emaw zat lak an ni. MDC pasarih an bàn hnu thla hnih chhungin thawktu lak thar, kaisantir leh dah ngheh mi 214 an awm niin RM Chakma chuan a sawi.

RM Chakma chuan, CADC sorkar chu a rang thei ang bera ṭhiat turin Governor leh Chief Minis­ter a ngen a; inthlan ṭhat thuai an duh thu a sawi a ni.