Zo nun ze mawi inzirtir thar lehna buatsaih

Central YMA chuan June 27, Thawhlehni zan khan Vanapa Hall-ah Zo nun ze mawi inzirtir thar lehna hun an buatsaih a, Aizawla YMA branch aiawhte an tel.

Inkhawm hi CYMA vice president Vanlal­ruata'n a kaihruai a; thu sawitu CYMA president Lalbiakzuala chuan, Zo nun ze mawi chhawm nung turin ngaih­tuahna tak tak sên a ngai tih sawiin, "Tunlaia khawvel, digital khaw­velah awm tawh mah ila, kan pi leh pute'n an lo chhawm nun ṭhin kha a ṭring tawh, hmânlai thil a ni tia kan chhawm nun loh chuan Zo nun ze mawi hi a bo zel dawn a ni," a ti.

Lalbiakzuala chuan, Zo nun ze mawi nei turin hla takah kal kher a ngai lo tih sawiin, "Tuna kan awm dan ang ang hian a lantir theih reng a; mi ṭhenkhatte'n tlawmngaihna a bo tawh ang hiala an sawi fo pawh hi a dik lo," a ti a; hman lai leh tunlaia tlawmngaihna lantir dan leh a lan chhuah dan a inan loh thu a sawi.

Vanlalruata chuan, ram pum huapin Zo nun ze mawi inzirtir thar leh ṭul viau mah se, sum leh pai tam tak a ngaih vangin YMA ang chuan a harsa tih a sawi a, "Branch 100 awmna Aizawl khawpui aṭanga kan Zo nun ze mawi kan inzirtir thar loh chuan awmzia tak tak a neih dawn loh avangin khawpui chhung aṭangin bul ṭan a ni," a ti.

Zo nun ze mawi inzirtir thar lehna inkhawmah hian resoure person R Lalngheta, CYMA assis­tant secretary-in thupui a sawi a; sawihona hun hman nghal a ni.

Central YMA general secretary Lal­hmachhuana sawi danin, YMA-ah hian member 4,04,722 an awm mek a, branch 805 awmin, chung zinga branch 100 chu Aizawl khawpui chhunga branch-te a ni.