Lei tawlh vangin kawngpui a pawrh chhuak

Seling leh Tuirini lui inkar, Tuirini lei aṭanga km. 1 vela hlaah kawngpui chu Thawhlehni zan khan lei hnuai aṭangin a pawrh chhuak a, hei hi a chhhak lamah lei a tawlh vang nia hriat a ni. Kawngpui pawrh chhuak avang hian hun eng emaw chen lirthei kaltlang thei loin an tâng.

Seling YMA hruaitute hnen aṭanga thu dawn danin, kawngpui a pawrh chhuahna bulah kawng chhak lam, metre 80 vel aṭangin lei a tawlh a, chu chuan kawngpui chu a nêk a, kawngpui chu a hnuai lam aṭangin a pawrh chhuah phah ta nia a lan thu an sawi.

PWD chief engineer (Highway) K Lalsawm­vela pawhin, hnuai lam aṭanga kawngpui pawrh chhuah chhan chu lei tawlhin a nêk nasat vang a nih ber thu a sawi a; kawngpui chu lirthei chi tin kal theihin nimin khan siam tlang nghal a nih thu a sawi bawk.

Hetih lai hian, Keifang leh Tuivawl inkara leimin nasa tak chu thenfai vek la ni lo mah se, thenfai mek zel a ni a, lirtheite pawh an kal thei a; mahse, truck lian zingah mipui ni tin mamawh phur tih loh chu kal phal a ni lo.

Zawhna chhangin K Lalsawmvela chuan, leimin paih hna chu a thlanga ram neituin leivung paih a phal loh avangin a chak thei lo tih a sawi a, "Ram neitu nen kan indawr a, a ramah lei paih a phal chuan chak zawkin hna kan thawk thei ang," a ti.

PWD Chief Engineer chuan, leiminna hmunah hian lei la min belh zel thei tura ngaih pawh a la awm tih sawiin, "Ruah a sur hlek chuan a tlak belh zel a, lei tla zelte thenfai nghal zel a nih theih nan khawl kan chhawp reng a ni," a ti.

Leimin thenfai hna hi chawhma dar 10 aṭanga tlai dar 4 thleng thawh ṭhin nia thu dawn a ni.