Khawzawl dist.-ah mi 15 man tawh

Khawzawl District Task Force chu nimin khan an chairman H Lianzela, district bawrhsap hoin an ṭhu a, inkhàrkhip kalpui tawh china district chhunga hmalaknate an thlirho bakah, kal zel dan turte an sawiho. Khawzawl district-ah hian inkhârkhip thupek bawhchhia mi 15 man an ni tawh tih an tarlang.

Meeting chuan, buh leh bâl leh thlai chîng uar tura mipui zirtirna chhunzawm zel an rél a, thlai chi dah khawmna (seed bank) chu ei leh bar thar chhuah kawnga hmasawnna thlen ngei tura hmalak ni se, an ti. Khawzawl wholesaler-te hnen aṭanga buhfai, alu, dailuah, sangha ṭín leh thil dang an dawn chu zonal officer-te'n bial fan paha a remchan anga an sem turin an dah.

Hmarchhak state pali aṭanga Mizo­rama haw tur zinga Khawzawl district mi 12-te chu quarantine centre atana ruahman DC Rest House-ah dah an ni dawn tih an sawi a; an district-ah mi 276 khung hran tawh niin, an chhuak vek tawh a, swab sample test mi paruk awm tawhin, Covid-19 an kai lo vek tih an sawi bawk.