MCAB-in 2016-17 ah nuai 624.16 a hlêp

Mizoram Cooperative Apex Bank (MCAB) Limited chuan, nimin khan Vanapa Hall-ah General Assembly vawi 24-na an hmang a; Cooperation department changtu leh chief minister Lal Thanhawla'n a hmanpui. MCAB hian kum 2016-17 chhung khan cheng nuai 624.16 an hlêp a ni.

Chief Minister chuan, tun hmain cooperative movement leh society-te a kal tur anga a kal ṭhin loh avangin a hlawhtling vak lo a, tunah erawh chuan society-te enkawlna a changtlun tawh avangin a hlawhtling mek zel tih a sawi a, "Inkaihhruaina dan kan zawm leh zawm lohah a hlawhtlinna hi a innghat a ni," a ti.

Lal Thanhawla chuan, MCAB chu Mizo mipuiin an hmang ṭangkai hle tih sawiin, "Ṭangkai leh zuala mipuiin an hman theih nan a thawktu aṭangin an member-te leh mipui mimirah inzirtirna ngaih pawimawh a ṭul," a ti a; mipui tan tunlai banking technology an chhawp chhuah mek chu lawmawm a tih thu a sawi.

Bank-te sum enkawlna leh mipuia sum an thehchhuah tehfung, Cash to Credit Ratio (CD Ratio) chungchangah CM Lal Thanhawla chuan, "Mizorama bank awm mekte'n CD Ratio hi RBI phût aia hniam fê an neih ṭhin chu tisang turin vawi tam tak kan hrilh ṭhin. Apex Bank-in RBI phût ang CD ratio an pha hi a lawmawm. An balance sheet aṭangin an ṭhang a ni tih a chiang a ni," a ti.

Assembly kaihruaitu MCAB chairman T Lalmuanpuii'n MAC chanchin, hmasawnna an neih te, an ṭhan dan te, hlawhtlinna an neihte leh an hmachhawpte a sawi.

MCAB hi kum 1982-a din niin, Mizoramah branch 17 an nei mek a; Board of Director-ah mi awmin, thawktu mi 163 an awm mek. Kum 2016-17 chhunga an hnena suh dah luh (deposit) zawng zawng chu cheng nuai 72406.26 niin, cheng nuai 624.16 an hlêp a; CD ratio chu 58.43% a ni. Kum 2014-15 chhungin cheng nuai 389.79, kum 2015-16 chhungin nuai 614.65 an hlêp bawk.