Transport directorate building thar hawng

Vanapa Hall bula Transport directorate building sak thar chu nimin khan Transport minister John Rotluangliana'n a hawng. Minister chuan, Transport department chu Mizoram sorkara department zingah sorkara sum chhûng lut tam ber pawl a nih thu a sawi.

Transport Minister chuan, Mizoram State Transport (MST) bus-te chu sum thawh chhuahna ni loin, sorkar sum tirîraltu anga ngai an awm ṭhin tih sawiin, "MST bus-te hi hlâwk tura tlantir an ni lo a, mipui phurrit chhâwk zângkhai turin man tláwm taka tlantir an ni zawk," a ti.

Transport department a enkawl chhungin MST bus thar paruk lei a nih thu sawiin, "Sumo chuan man aia a tlàwm zawk avangin thingtlang khaw tam takin MST bus tlantir an duh a ni," a ti.

John Rotluangliana chuan, Chal-tlanga Transport pisa tualzawlah consumer petrol pump chu retail outlet-a leh tum a nih thu te, Hlimen-a Automated Vehicle Inspection Centre sakna tur sum cheng nuai 1500 sorkar laipuiin a pawm tawh thu te, zu rûi chunga lirthei khalh-te endik nan breath analyser 50 leina tur sorkar laipuiin a remtihsak thu te, Aizawl Traffic Jam Free a puitlin theih nan NEDP hnuaiah Transport department hmalak nan cheng nuai 500 dah a nih thute a sawi.

Aizawl khawpui tâwt lutuk tih-ziaawm nan khawpui daifêmah auto-rickshaw leh khawpui chhungah two wheeler taxi tlantir a nih thu sawiin Rotluangliana chuan, "Aizawl khawpui chhung bikah ka hun chhungin taxi permit thar pek chhuah a ni lo," a ti. Aizawl DTO office chu an indaih loh em avangin thingtlang khuate enkawltu tur DTO (Rural) siam tumin chak taka hmalak a nih thu a sawi bawk.

Transport department hi kum 1972-ah Supply and Transport department tiin a ding ṭan a, kum 1985-ah tuna sak ṭhat tâk directorate building awmna hmunah Joint Director hoin an awm. Directorate building hmasa chu kum 2005 khan Disater Management-in a him tâwk loa hriain ṭhiat turin hriattir a; ṭhiah a nih hnuah sak ṭhat leh niin, a sak nan cheng nuai 527.02 sên a ni.