Inremna awm lo se, tuna kan dinhmun hi kan pha lo hle ang - Vanlalzawma

MNF treasurer Vanlalzawma chuan, MNF leh India sorkar inkarah inremna awm lo se chuan Mizote leh Mizoramin tuna an dinhmun an phâk loh hle tur thu a sawi.

Nimina Bungkawn MNF unit member thar lawm luhna inkhawm, YMA In, Bungkawn Venglaia neihah thu sawiin Vanlalzawma chuan, June 30-a Remna Ni lo thleng tur chuan ngaihhlut a phû hle tih a sawi a, "A chhan chu, kan sakhua, culture leh customary law-te humhalhna dan, Indian Constitution Article 371(G)-ah a inziah ṭanna ni a ni," a ti.

Vanlalzawma chuan, inremna tuhthlung vanga sorkar laipuiin dan hmanga Mizote leh Mizoram a humhalhna dan hrang hrangte chu Mizoram sorkar remtihna tel loa sorkar laipuiin a hlih theih loh turin Parliament danah nemngheh a nih thu a sawi a, "Hengte hi inremnaah khan tel ta lo se, vawinah hian hnam dangin min chîmral tawh hial mai thei. Inremna kha awm lo se, Mizote hian vawiina kan dinhmun hi kan pha lo hle ang," a ti a; Remna Ni chu a hlut thu a sawi.

MNF thuchhuah chuan, nimina lawm luhna inkhawmah hian party hrang hrang aṭang-in MNF-ah voter 64 an lawm lut niin a tarlang.