KHAWTHLIR

Pump endik
India Oil Corporation (IOC) chuan 'Check & Win' campaign an nei a, Mizorama filling station (petrol pump) hrang hrangte an endik mek zel. IOC hian Aizawla pump ṭhenkhatte an endik tawh a, an endik tawh chinah a quantity leh quality-te a dik tawka ngaih a ni.

Sorkar scheme zir
CARE World Vision India leh Young Women Christian Association (YWCA) chuan, nimin khan IPR directorate auditorium-ah 'Training on care givers on government schemes and entitlements' tih an buatsaih a; Social Welfare, Food, Civil Supplies and Consumer Affairs, Health, UDPA leh Transport department-a sorkarin scheme a neihte leh hamṭhatna dawn theihte sawifiah a ni.

ESDP training
Mizoram Food Processing Research & Training Centre (MFPRTC), Phaibawkkawn, Selingah nimin khan NEDP hnuaia Entrepreneurship Development Scheme aṭangin 'Entrepreneurship & Skill Development Programme (ESDP) on Post-Harvest Management' batch hmasa ber ṭan a ni. Training hi Seling, Sesawng, Tlungvel leh Tlangnuam khuaa kut hnathawktute puala buatsaih a ni.

MIS sîksawi
Mizoram Information Service (MIS) officer pathum chu tun hnai khan sawn an ni. Mina Zoliani Joute chu Governor aṭangin Directorate-ah, Vanlalmuana chu Lunglei aṭangin Governor-ah, C Lalremruati chu Directorate aṭangin Lungleiah awm tura tih an ni.

Graduate result
Mizoram University chuan Thawhlehni zan khan MZU hnuaia graduate final year exam result a tichhuak a, result hi a buin kimchang taka tihchhuah a la nih loh avangin a kimchanga hriat theih a la ni lo. Mizo Students Union chuan thuchhuah siamin, MZU-in graduate result a tichhuak chu lawmawm an tih thu leh, result-ah buai a awm loh an beisei thu an tarlang.