August-ah positivity rate 20% aiin a sang vek

August 9, Thawhlehni khan Mizoramah Covid-19 vei mi 135 hmuh chhuah a ni a; August thlaah positivity rate 20% aia sang vek a la ni. Nimin khan hripui vei dam tawh mi 264 chhuahtir an ni a, Covid-19 vanga thi mi pakhat a awm belh.

Thawhlehnia Covid-19 positive hmuh thar mi 135-te chu mipa 57 leh hmeichhia 78 an ni a; rapid antigen test hmanga hmuh chhuah vek niin, positivity rate 25.28% a tling.

August thla chhungin hripui vei mi 1,722 hmuh chhuah a ni tawh a, Covid-19 positivity rate ni tin 20% chung lam vek niin, August 6 bikah 30% chung lam a ni.

August 9, Thawhlehni tlai dar 5:30 khan hripui vangin C Rualkhuma (69), Ainawn Veng, Aizawl chu State Referral Hospital-ah a thi. Covid-19 positive a ni tih August 8, 2022 khan hmuh chhuah niin, SRH-ah enkawl nghal a ni a; natna dang nei a ni.

IDSP record angin, Mizoramah Covid-19 vei 2,34,522 hmuh chhuah a ni tawh a, mipa 1,09,215 leh hmeichhia 1,25,307 an ni a, mipa aiin hmeichhia 16,092-in an tam zawk. Nimin tlai dar 5 thleng khan mi 2,32,897 (99.31%) chhuahtir an ni tawh a, mi 715 (0.30%) thi tawhin, enkawl mek mi 910 (0.39%) an awm.

Kum 2011 chhiarpui angin, Covid-19 vei hmuh tawh 2,34,522 chu state mipui zat aṭangin 21.37% a tling a; mi 1,000 zelah positive 213 an awm tawh ang a ni a, hripui vangin mi 1,00,000 zelah mi 64 an thi tawh ang a ni.