KHAWTHLIR

MPCB Chairman
Mizoram Pollution Control Board chairman thar Rosiama Vanchhong, IFS (Rtd.) chuan a hna a chelh ṭan a, nimin khan hlanna hunserh hman a ni. Inkhawm hi MPCB secretary C Lalduhawma'n a kaihruai a, Rev. F Lalrinnunga’n Pathian hnena hlanna hunserh a hmang a ni.

Zirlaibu leh Bible
MZP General Headquarters chuan Myanmar tualchhung buaina avanga Mizorama rawn lut, Farkawn leh Zokhawthara awm zirlai naupangte tan August 9, Thawhlehni khan zirlaibu leh naupang Bible ṭhahnem tak an hlan. Farkawnah hian naupang Bible bundle 20 pek a ni a, Zokhawtharah zirlaibu leh naupang Bible pek a ni. Zirlaibu leh Bible-te chu Myanmar ram chhung khaw hrang hrangah sem darh leh a ni ang.

Tuizém sem
AMC Ward-XVI councillor R Lalawmpuii chuan nimin zing khan a biala chhungkaw 80 hnenah tui litre 500 dawng tuizém a sem. R Lalawmpuii chuan, tuizém dawng tur àwm an dawn theih nan YMA leh MHIP-te nen ṭang tlangin a dawngtu tur thlan a nih thu a sawi.

Handloom exhibition
National Bank for Agriculture & Rural Development (NABARD) chuan National Handloom Day pualin nimin khan Vanapa Hall-ah Handloom Exhibition an buatsaih a, August 10-12, 2022 chhung a awh ang. National Handloom Day hi India ramah kum 1905-a Swadeshi Movement (Mahni ram dehchhuah chawisanna lama hmalakna) hriatreng nan kum 2015 aṭangin lawm ṭhin a ni.

Ngopa History
Ngopa Welfare Committee, Aizawlte lehkhabu buatsaih 'Ngopa History' tih chu nimin khan Human Resources Development vice chairman L Thangmawia, MLA-in a tlangzarh. L Thangmawia chuan Mizo history lehkhabuah hmarchhak lam history ziak a tlem thu sawiin, "Hmarchhak history bu rintlak tak mai tih chhuah a ni ta hi a lawm. Zoram mipuite hnena phochhuah a nih theihna atana thawktute zawng zawng chuangah lawmthu ka sawi a ni," a ti.