Nunna chánte i hre hreng ang u - Larsap Remna thuthlung tihdanglam a thiang lo - Zorama
Nimin, June 30 kha India sorkar leh MNF-in inremna an ziah champha, Remna Ni a ni a, MNF party chuan hmun hrang hrangah an hmang. Governor Lt.Gen. Nirbhay Sharma pawhin Remna Ni pual hian thuchah a tichhuak a, remna a awm theihna atana nunna chánte hre reng turin Mizo mipui a chah.
Governor chuan, Mizoramin Remna Ni vawi 31-na a thleng thei chu a lawmpui thu sawiin, "Mizo mipuite thinlung takin chibai ka bûk a, an kal zelna turah duhsakna sang ber ka hlan a ni. Remna Ni a lo thlen hian remna kan neih theihna atana nunna hial chánte i hrereng ang u. Mizoramin remna tluantling leh hlawhtling berte zinga mi a nei thei hi mipui, kohhran leh NGO-te thawhhona vang a ni," a ti.
Mizo mipuite chu remna leh muanna chhawr ṭangkai tura sáwmin Larsap chuan, "A bik takin nakin lawka ram hruaitu tur
ṭhalaite chu ruihhlo - zu, damdawi hman sual leh vaihlo kaihhnawih chi reng rengah inhnamhnawih loh a pawimawh," a ti a; Mizo mipuite chu tawrhna nasa tak hnuai aṭanga hlawhchhuah remna hlut thiama vawng nung zel turin a chah.
MNF president Zoramthanga chuan Tuirial East Block bultuma Lungdaia Remna Ni lawmna a hmanpui a; thu sawiin, "Constitution leh dan pangngaite chu Parliament-in a duh ang angin a tidanglam thei a, inremna thuthlung anga siam dante erawh chu tihdanglam a nih dawn chuan remna siam chu a khawih danglam vek dawn tihna a ni," a ti.
Zoramthanga chuan, inremna thuthlung angin India Constitution-ah Mizoram chu state a nihna ang tur leh venhim bik a nihna tur ziah hnan a nih thu sawiin, "Thuthlung chu bawhchhiain India sorkar hian thil ti ta se la, MNF pawhin an tih tur leh tih loh tur an tiamte an sût leh vek thiang tihna a ni," a ti a; rinawm lo leh rintlak loh sorkar nih chu India ram tan tih chi a nih loh thu a sawi.
MNF President sawi danin, sorkar laipuiin hmarchhak state-te special category hlihsak a tum
ṭum pawhin Prime Minister hnenah lehkha a thawn a, Mizoram remna thuthlungah Mizoram chu special category-a dah tur tih a nih angin India Union tan remna thuthlung bawhchhiat a thiang lo tih a ziak a ni.
Remna Ni hi Aizawla Mizo Hnam Run, Lungleia Mizo Hnam Run, Thenzawl leh Kawnpuiahte pawh hman a ni a; MNF senior vice president Tawnluia, vice president R Tlanghmingthanga, vice president Dr R Lalthangliana leh treasurer Vanlalzawma ten an hmanpui a ni.