GST hman ṭan a ni ta

Nizan zanlai aṭang khan India ram pumah chhiah lak dan thar, Goods & Service Tax (GST) hman ṭan a ni a, Mizoramah pawh vawiin aṭangin GST anga chhiah pek tawh tur a ni.

Vanglaini palaiin Taxa­tion department hotute hnen aṭanga thu a dawn danin, GST hi India ram puma July 1, 2017-a hman ṭan tura tih a nih angin, Mizoramah pawh hman ṭan a ni dawn a; chhiah hrang hrangte chu GST-a bituk zat ang veka pek tawh tur a ni.

Ruahman lâwk ang chuan, GST hi Delhi-ah prime minister Narendra Modi-a'n a tlangzarh a, tlangzarhnaah hian Taxation minister Lal­sawta pawh a tel. Taxation Minister hian GST chu Mizoramin a hlâwkpui ngei a beisei thu a lo sawi tawh a ni.

Lasawta chuan tuna kalphungah chuan state-in bung­ruaah chauh chhiah a lak thu leh service-ah chhiah lak a nih loh thu a sawi a; GST hman hnuah tha (service) man lak ve tawh tur a nih thu sawiin, "Government of India chauhin service tax a la a, GST-ah chuan Central rualin state pawhin service tax kan la ve tawh dawn," a ti.

GST hman a nih dawn avang hian Taxation de­part­ment chuan Mi­zo­ram hmun hrang hrangah chhiah pe ṭhinte kokhawmin, GST hman dan leh a kalphungte an zirtir ṭhin a ni.