BJP-in CADC sorkar ṭhiat turin Larsap an ngen

BJP, Mizoram Pradesh hruaitute chuan June 29, Ningani tlai khan Governor Lt. Gen. Nirbhay Sharma chu Raj Bhavan-ah an kâwm a; Chakma Autonomous District Council (CADC) sorkar ṭhiat turin an ngen.

BJP tarlan danin, kum 2013-a CADC inthlanah mipuiin Indian National Congress sorkarna an siamtir a, seat awm zawng zawng 20 aṭangin seat 17 an la a ni. Mipuiin hmasawnna chak taka a kal an beisei laiin eirukna a hluar a, rorelna felfai a awm thei lo.

Executive member (EM) thlak chhen a nih avangin mipui an buai a, kum li chhungin EM vawi thum sîksawi a ni a; CADC EM thlak phûtin EM pali leh office nei MDC pathumte'n April 24, 2017-ah bânna an thehlut a ni.

Mizoram sorkarin CADC-a hman tur sum thla tinin a pe a, ruahmanna felfai a awm loh avangin CADC chuan sum lamah harsatna lian tak an tawk mek. Chu chuan CADC hnuaia thawkte tan harsatna a siam a, hlawh pawh a vaiin an lak theih loh phah bawk.

CADC-in sumah harsatna nasa tak a tawh mek laiin thawktu tam tak lak belh a ni a, sorkar hnathawk hlawh tihsan niin, MR leh contract-a thawkte a rûkin dah ngheh an nih thu tarlangin BJP chuan, "CEM awm loh laia CEM charge latu MDC pahnihin thawktu thar pahnih an la ngawt kha thil mak a ni. Heng hian Governor thupek No A.11013/1/200-DCA dt. 16th. August 2016-a tihchhuah a kalh. An thil tih hi Governor zahlohna leh chona lian tak a nih avangin CADC hi ṭhiah ngei a ṭul," an ti.

BJP chuan, eirukna nasa tak vanga Central sum hmuh hmanga din Modernisation of Kamalanagar Town, CADC Secretariat Building, CADC Session Hall te leh Longpuighat to Kukurduleya road leh a dangte chhunzawm theih a nih loh thu sawiin, "Anti Corruption Bureau chhui ngai khawpa a awm hian CADC-a Congress sorkar hi tihtawp ngei a ṭul a ni tih a tilang," an ti a; rorel lai MDC tam takin pay advance hmangin sum tam tak an lak lâwk niin an sawi bawk.