Aizawlah faina hnatlang buatsaih a ni

Swachh Bharat Abhiyan bawhzuina chi khat atan, nimin zing khan Sports & Youth Services department chuan faina hnatlang (cleanliness drive) an buatsaih a; Aizawl khawpui dung, chawhmeh zawrhna bazar leh infiamna hmun pawimawhte an tifai.

Cleanliness Drive puala Lammuala inkhawmah Sports & Youth Services minister Zodintluanga chuan, India rama state fai berah Mizoram chu siam tuma hmalak mek a nih thu a sawi a, "Aizawl pawh India khawpui hrang hrang zinga fai ber a ni thei. Chumi atan chuan a chhunga chengte'n faina leh thianghlimna kan ngaih pawimawh a ṭul," a ti.

Zodintluanga chuan, hnatlang chu faina ngaih pawimawhzia entirna mai leh mipui zirtirna tur a nih thu sawiin, "Vawi khat tihfai hnua theihnghilh zui lo a, faina hi ni tin nunpui ṭheuh zawk tur a ni," a ti a; Mizo mipuite chu tibâltu ni lo a, tifaitu nih tum ṭheuh turin a chah.

Cleanliness Drive-ah hian SYS department-a peng hrang hrang - sports association, NCC, NSS, Bharat Scouts & Guides, adventure club, Sports Authority of India (SAI) leh Mizoram State Sports Council (MSSC) aṭangin mi 1,700 chuang an tel a ni.