Tuihna humhalh zirho

PHE WATSAN Division, Khawzawl leh Khawzawl Group YMA bultumin, nimin khan Zaingen Veng YMA Hall-ah tuihna humhalh leh faina chungchangah awarness campaign buatsaih a ni a, PHE engineer-in-chief Lalmuan-zova'n a hmanpui.

Lalmuanzova chuan, tuihna humhalhnaa Khawzawl Group YMA hmalakna an hriat ṭhin thu sawiin, hmahruaitu nih tum tura a duh thu a sawi a, "PHE chuan mipuite hnena tui in tur pek bakah, thianghlimna lamah hma a la a, tui leh thianghlimna hmanga mipuite hriselna ṭha siamsak hi a tum ber a ni," a ti.

Khawzawl Group YMA president PC Rosiama pawhin thu sawiin, Khawzawl leh Chawng-tlai tui lâkna Changel lui chu ram tihchereu vangin tuihna a tlem tial tial tih a sawi a, "Siam ṭha turin Khawzawl Group YMA leh PHE ṭang dunin kum 10 dawn hma an lak hnuah tunah chuan chhuanawm khawpin a ngaw leh tawh a ni," a ti.

Campaign-ah hian Khawzawl Group YMA chhunga YMA branch 20 hruaitu te, sub-committee pêng hrang hrang hruaitu te, Khawzawla V/C member te, tlawm-ngai pawl hruaitute leh sorkar department hotute an tel a ni.