KHAWTHLIR

Remna chibai bûk
MPC chuan thuchhuah siamin, India sorkar leh MNF-in inremna thuthlung an ziah champha vawi 31-na pualin Mizoram chhung leh páwna Zo hnahthlak zawng zawng remna chibai an bûk. MPC chuan, "Kan ram leh mipui hamṭhatna tur te, kan dikna leh chanvo humhimna atantea inremna thuthlunga ziah fel tawh, kum 30 râl kan kai tawh hnu pawha tihpuitlin tuma hmalakna tluantling hmuh tur a awm lo fo hi pawi kan ti takzet a ni," an ti.

VLF pisa hawng
Léng khuaa self help group hrang hrang intélkhawmte enkawlzui tura sak, Village Level Federation Office building thar chu Ningani khan Mizoram State Rural Livelihood Mission (MzSRLM) chief executive officer H Lalchhandami'n a hawng. In thar hawn tâk hi BADP sum Rs. 7,00,000 hmanga sak a ni a, a dung ft. 30 leh a vâng ft. 18 a ni.

Thisen pe
Nimin khan ṬKP Rahsi Veng Bial-in BCM Moria kohhran hall-ah Christian Hospital, Serkawn tan thisen unit 71 an pe a, a petute mipa 51 leh hmeichhia 20 an ni. LIKBK ṭhalai pawl, Lawngtlai College Veng Bial-te'n Lawngtlai District Hospital tan thisen unit 58 an pe a, a petute mipa 50 leh hmeichhia pariat an ni. Lunglei Bazar Bial KṬP member mipa 22 leh hmeichhia parukte'n Lunglei Civil Hospital tan unit 28 an pe bawk.

Thing phun
Ramhlun Vengthara lei tlakhniamna hmunah Ramhlun Vengthar Branch YMA chuan nimin khan thing phun hnatlang an nei a, DMR minister C Ngunlianchunga'n a hmanpui. DMR Minister chuan, kumin chhunga Mizoram hmun hrang hrangah chhiatna a awm chu pawi a tih thu a sawi a, "Kum 2012-a Ramhlun Vengthar lei chê vanga chhungkaw eng emaw zatin an in an luah chhunzawm ngam lo hi a pawi hle a ni," a ti.