Aizawlah two wheeler taxi permit 3,646 ; District-ah permit 385 pek tum a ni

Aizawl khawpuiah two wheeler taxi permit 3,646 a awm mek. District khawpui 10 leh Thenzawlah two wheeler taxi 385 tlàntir tura rawtna Mizoram sorkarin a pawm tawh a, permit pek chhuah hun tur erawh hriat a la ni lo.

RTI Act hmanga zawhna Transport department-in an chhan danin, AMC huam chhung­ah two wheeler taxi permit 3,646 a awm mek; AMC bikah permit pek chhuah belh tumna a awm leh awm loh zawhna chu, "Tun dinhmunah AMC huam chhung bikah two wheeler taxi permit pek belh tumna a awm àwm hriat a ni lo," tia chhàn a ni.

Vanglaini thu dawn danin, State Transport Authority (STA) chuan district hrang hranga DC-te hnenah lirtheia eizawng páwl hrang hrang leh NGO-te nen inráwnin, an district khawpuia two wheeler taxi service an duh leh duh loh sawiho turin an ti a; district khawpui zawng zawng leh Thenzawlah tlantir tura rawtna an dawng.

STA chuan district thuneitute aṭanga rawtna a hmuh zûlzuiin a thawh khatna atan district khawpui 10 leh Thenzawlah two wheeler taxi permit 385 pek ṭha an ti a ni.

STA hian sorkar hotute pawmpui tura an thlen hnuah sorkarin a pawmpui tawh a; permit pek chhuah/dil theih hun tur leh thil ṭul dangte chu STA kutah awmin, an la ngaihtuah rih lo nia thu dawn a ni.

STA hian a thawh khatna atan two wheeler permit Lungleiah 50, Siahaah 50, Champhaiah 45, Kolasib-ah 30, Serchhipah 38, Lawngtlaiah 50, Mamitah 20, Saitualah 30, Khawzawlah 25, Hnahthialah 35 leh Thenzawlah 12 pek a remti a; sorkarin pawm­puina a pek tawh rualin, permit pek chhuah/ dil theih hun tur a la hriat loh thung.