Assembly inthlanpui 2023 atan MPF hmunpui an inbuatsaih ṭan

Mizoram People Forum (MPF) Governing Board chuan nimin khan inthlanna thianghlim a awm theihna tura mipui zirtirna tur thu ziak tura an ruat, resource person mi pakuate nen hmalak dan tur Synod Committee Room-ah an sawiho.

Sawihona hi MPF vice president Upa Lal­huapzauva'n a kaihruai a, general secretary Rev. Lalramliana Pachuau-in tun hnaia MPF hma­lakna hrang hrangte leh resource person tura an ruatte tih tur leh mawh­phurhna turte a sawifiah.

Mizorama inthlanna thianghlim a awm theihna tura mipui ṭan lâk dan tur te, political party-te hmalak dan tur te, sorkar ṭha a awm theihna tura hmalak a ṭul dante sawiho a ni. Heng thupui hmang hian resource person-te'n mipui zir theih turin thu an ziak ang a, chu chu district leh constituency hrang hrangah seminar buatsaihin zirho ṭhin a ni ang.

MPF hruaitute chuan, kum 2023-a Assembly inthlanpui neih turah inthlanna thianghlim a awm theih nan MPF-in hmalak ṭan a tum tih an sawi.