Kan ram leh hnam tan theihtawp Kan chhuah zel dawn - Deputy CM

Khawzawl District Treasury office chu nimin khan bialtu MLA Tawn­luia, deputy chief minister-in a hawng. Tawn­luia chuan, Mizoram leh hnam tan theihtawp an chhuah zel dawn thu a sawi.

Deputy Chief Minister chuan, MNF party chu an fel ber lo a, an ṭha ber lo tih sawiin, "Keini aia ṭha leh fel zawk tam tak an awm. Mahse, Pathian leh mipui zarah sorkarna chang turin tun hunah min dah a ni. Tlanchhiat emaw kan tum lo a, kan ram leh hnam dinchhuah nan theihtawpin kan thawk zel dawn a ni," a ti.

Khawzawl District Treasury a nihna tur ang taka a kal theihna atana thawktute fakin Tawn­luia chuan, Treasury office venhim leh enkawl kawngah sorkar thawhpui turin Khawzawl mipui a sáwm a ni.

Tawnluia chuan, dam lohna avangin kum khat zet Delhi-ah a inen­kawl tih sawiin, "Chutih chhung chuan kan minister zawng zawng­te'n Khawzawl district hmasawnna tur leh district-in a ken tel depart­ment hrang hrangte fùke kima a awm theihna tura an hnathawh hi ropui ka tiin lawmawm ka ti hle. Minister zawng zawng chungah lawmthu ka sawi a ni," a ti.

Khawzawl Treasury hawnna inkhawmah hian MLA C Lalmuanpuia leh Khawzawl bawrhsap CC Lalchhuangkima te pawhin thu an sawi a; district treasury officer Lalchhuanliana Sailo-in an pisa dinhmun tlangpui a sawifiah a ni.