Lunglei - Tlabung kawng dang rih zel
Lunglei leh Tlabung inkar NH-302 kawngpuia a chhe zual lai, Tuichawng leh Sihphirtlang inkar thawm ṭha tura kawng siamtute karna atana Tlabung Commercial Vehicle Joint Action Committee-in August 10, Nilaini aṭanga Lunglei-Tlabung kawngpui an dan chu an la chhunzawm zel.
Tlabung aṭanga thu dawn danin, kawngpui dangtute'n an danna hmun chu Tlabung SDO (Civil) H Zonunmawia leh police-in a khát tâwkin an tlawh a, thil duhawm lo leh boruak ṭha lo thleng a awm lo.
Kawng chhe zual laite chu kawng siamtu company-in thawm ṭhat tumin hma an la mek a; kawng khuar hnawhna tura lung lak tur an tih hmangin an thawm ṭha ngei tih finfiah hnu leh, harsatna tâwk loa lirthei tlân theihna khawp nia an ngaih hnuah chauh kawngpui dan tihtawp an tum a ni.
Kawngpui khuar chhe zual lai hnawhna atana hman tur lungte chu vawiin aṭangin Khojoysury aṭangin phurh ṭan a ni dawn a; lung chu Tlabung Commercial Vehicle JAC-a tel pawl pakhat Tlabung Truck Owners' Association (TTOA) member-te'n rate pangngai aia tláwmin an phurhsak dawn. TTOA member-te'n Khojoysury aṭangin an phur ang a, Kawrpuichhuah péng hmun remchang lai, kawng ṭha chin aṭangin company truck-in lung hmanna tur hmunah an dah ve thung ang.