Mi rinawm leh taimate dinchhuahna tur ram siam a ṭul - Congress President

Congress party president Lalsawta chuan, leilung leh a chhunga thil nungte (environment) tichhe lo zawngin hmasawnna hi kalpui a ngaih thu leh mi rinawm leh taimate din­chhuahna tur ram siam a ṭul thu a sawi.

Mizoram Pradesh Mahila Congress-in nimina Lal Thanhawla Auditorium-a intuaitharna an buatsaihah thu sawiin Lalsawta chuan, ram hruaitute'n an ram leh mipuite an enkawl dan a zirin ram a nuamin a hrehawm thei tih a sawi a, "Ram rorelna ṭha neia mi taima leh rinawmte dinchhuahna siam turin ram mipui rilru siamṭha thei zawng leh an ngaihsan zawng kan thlak a pawimawh hmasa a ni. Environment tichhe lo zawnga hmasawnna hi kan kalpui a ṭul," a ti.

Lalsawta chuan, mipui thawhkhawm sorkar sum chu mipui dinchhuahna tura hmanraw pawimawh ber pakhat a ni tih sawiin, "Ram roreltute'n an thu­neih­na leh mipui sum hi mahni hausak nana hmang lo a, an rawngbawlsak mi­puite'n eizawnna ngêl­nghet, ram changkang, nuam leh him siam nan an hman a ngai," a ti a; sorkar sumte dik taka hman a ṭul thu a sawi.

MPCC President chuan, Congress sorkarin mipui leh kohhran duh loh záwng takin thil an ti nia an hriat thu sawiin, "A pawi ka ti a, kan tihsualah ngaihdam kan dil a ni," a ti a; Mizoramin Congress a mamawh tih hriain rilru thar neia an insiamṭhat mek thu sawiin, "Mizoram mipui pawhin kan hun liam tawha kan tlin lohnate min theihnghilhsak a, sorkar ṭha siam kan tum hi theihtawpa min thláwp turin kan ngen tak meuh a ni," a ti.

Intuaitharna hi Congress Mahila president Vanlalawmpuii Chawngthu-in a kaihruai a; thu sawiin, "Ram leh hnam siamṭha tur chuan vei hi a tâwk a, hausak leh retheih emaw, hmelchhiat leh ṭhat emaw a ni lo, tih tak zeta ngaihtuah a, kan ram siamṭhat duhna thinglung kan put a, ram kan vei hi a tâwk em em a ni," a ti a, ram vei turin hmeichhiate a sáwm.

Prof. Zokaitluangi pawhin thu sawiin, ram hruainaah hmeichhiain bul an ṭan a ngaih thu a sawi a, "Bul kan ṭanna tur chu Lalpaah ni se. Lalpa au chungin a kaihruai turin hma kan lak a ṭul tak zet," tiin, Congress party chu mi dangte entawn tlak ni tura kal a ṭul a ni," a ti.