Mipuiin duh loa hnawl hnu an nei tawh a, tunah nin em em an nei leh - ZPM Working President
ZPM working president K Sapdanga chuan, mipuiin duh loa hnâwl hnu an neih tawh thu sawiin, "Tunah hian an nin em em an nei leh a ni," a ti.
K Sapdanga hian August 10, Nilaini khan Central Hall, Venghluia ZPM Aizawl City Block inhmuhkhawmnaah thu sawiin, "Tuna khawvel ram ropui ber berte leh India rama state changkang ber berte hi thawhrim rah tél vek an ni a, chu kawng chu zawh turin mipui kan sáwm a ni. Sorkar kalphung thlak kan tum a, chu chu mipui duh dan pawh a ni," a ti a; rim taka hlawhtlinna neih chu ZPM thupui a nih thu a sawi.
ZPM a din hnua inthlanpui an hmachhawn hmasak berah seat pariat an lâk theih thu sawiin Sapdanga chuan, Election Commission of India-ah registration an neih tawh thu a sawi a, "Unit ṭhahnem tak nei, block ṭha tak tak nei tawh kan ni a, kum 2023 inthlan hmachhawn hi a phûrawm em em a ni. Innghahna tlaka min hmuh theihna turin kan ṭan a ngai a, kan fimkhur hle a ngai," a ti.
K Sapdanga chuan, kal sualna laka vengtu tur Val Upa Council an nei chu an vanneihna a nih thu sawiin, "VUC hian sorkar an thunun dawn lo a, sorkar an uap ang a, sorkar hotute kal sual palh tur an veng ang. Kamrula te hminga mipui sum chhehrelh chíng sorkar hotute zingah an awm lohna turin sorkar an uap mai dawn a ni," a ti a; VUC lakah chuan, 'Its my life' tih a rem dawn loh thu a sawi.
ZPM Working President chuan, mipuiin Mizoram dinhmun an hriat thu sawiin, "He dinhmun aṭang hian engtin nge kan tâl chhuah theih ang tih hi lungkham lian bera neih a ngai. Kan ram mipui hi hamṭhatna awlsam chi kan tiam ve ngam lo a, a thlàwna pek tur kan nei lo. Kan tiam theih chhun chu, thawh rim a thlawn tawh lo ang, tih hi a ni," a ti.
ZPM vice president Dr Kenneth Chawngliana pawhin thu sawiin, "Nakkum mai hian inthlanpui kan hmachhawn dawn a, kan hmabakah tih tur kan ngah hle. Tih tak zetin ṭan lak theihna kawng engkimah kan ṭan a ngai. Zonu, upa pawl leh ṭhalai frontal wing-te hi hnehtu kan nih theihna tura thil pawimawh tak an ni," a ti a; ZPM chuan mipui sorkar, sorkar ṭha siam an tum thu a sawi.