KHAWTHLIR

Vaccination drive
India ram zalenna champha vawi 75-na lawmna, Azadi Ka Amrit Mahotsav pualin Aizawl DC pisa leh Aizawl West CMO chuan nimin khan Assembly Annexe-ah Assembly Secretariat leh a chhehvela sorkar pisa hrang hranga thawkte tan Covid-19 vaccine precautionary dose a thlâwna lâkna, vaccination drive an buatsaih a; mi eng emaw zat hnenah vaccine pek a ni.

Ram dang bike hman khap a ni
Champhai district magistrate James Lalrinchhana chuan thupek chhuahin, Champhai district-ah sorkar phal loh ram dang bike hman phal a nih loh thu a puang. Champhai district hmun hrang hrangah dan loa lak luh foreign bike a tam a, zalên takin khawtual mi leh ráltlânte'n Mizoram/India ram chhungah dan bawhchhiain an hmang tih hriat a nih avangin thupek hi chhuah a ni.

DEE 2022 result
Mizoram Board of School Education chuan vawiin chhun dar 12 hian Diploma in Elementary Education Examination, 2022 (June) result a tichhuak dawn a; MBSE Office-ah leh website www.mbse.edu.in ah en theih a ni ang.

Hranghluite Kawmna
Art & Culture department leh Mizo Academy of Letters Joint Headquarters, Lunglei chuan nimin khan Lungleia Art& Culture Auditorium-ah Azadi Ka Amrit Mahotsav - Hranghluite Kawmna an buatsaih. Tawnhriat nei ṭha leh thu leh hla lama sûlhnu nei ṭha mi pali - Dr Chawngkhuma Chawngthu (Siaha), KT Chhawna (Lunglei), PC Lawmkunga (Aizawl) leh K Darchhawna (Lunglei Pukpui)-te kawm an ni.

Lehkhabu tlangzarh
Indopui Pahnihnaa India tana rál do tura inpe zinga mi chanchin ziahna, 'War Veteran Hav. H Kaphlira' tih lehkhabu Dr Laltluangliana Khiangte ziah chu nimin khan minister Lalchamliana'n a tlangzarh. Lalchamliana chuan, Mizo zingah war veteran an tlém tawh a, mi 17 chiah la damte zinga mi Hav. H Kaphlira chanchin chhiar theiha a awm ta chu lawmawm a tih thu a sawi.