Tlawva Small Hydel Project hawn a ni

Power & Electricity minister R Lalzirliana chuan nimin khan Champhai district-a Khawbung RD Block huam chhung, Khuangthing leh Thekpui inrìnaa Tlawva Small Hydel Project (SHP), kawlphetha megawatt 5 siam chhuak thei tur a hawng.

Tarlan danin, Tlawva SHP hi cheng nuai 7,340 hmanga siam a ni a, kawlphetha megawatt 2.5 siam chhuak thei khawl pahnih bun a ni. Suar tam tak chhawrdawh behchhana siam a ni a, tui khuahna hmun chu khawl (turbine) awmna aṭangin metre 101.3 (ft. 300)-a sangah a awm.

Tlawva SHP khawlte chu May-October chhungin MW 5 pe chhuak thei tur leh November-February inkarah chawhrualin MW 1 vel pe chhuak tura ngaih a ni a; March leh April-ah chuan khawl mamawh ang tui a awm dawn loh avangin kawlphetha siam chhuah a ni dawn lo.

Kum khatah kawlphetha unit maktaduai 13.14 siam chhuak tura ngaih a ni a, Champhai district a châwm zo tura ngaih a ni. Tluang taka khawl hman theih a nih chuan kum khatah cheng nuai 517.43 thawk chhuak thei tura chhût a ni a, kum 20 chhungin project thawhna man hmuh lêt beisei a ni bawk.

PE minister R Lalzirliana chuan, Tlawva SHP hi khawl pahnih hmanga MW 5 siam chhuak thei tura duan a ni a, kum tluanin full capacity-a a siam theih dawn loh avangin ṭhál laia tui khuahna siam tura ruahman a ni," a ti.

Tlawva SHP siam tur hian March 23, 2012 khan NORTECH Power Project, Kolkata chu inremna ziahpui a ni a; a tira sum ruahman chu cheng nuai 5749.08 niin, ennawn a nih hnuah cheng nuai 7,340-ah tihsan a ni.

NABARD aṭangin cheng nuai 5140.49 hmuh a ni a, Ministry of New & Renewable Energy aṭangin nuai 700 hmuh turah nuai 630 hmuh a ni. State matching share aṭangin cheng nuai 1,499.52 hmuh a ni bawk. Nimin thleng khan nuai 7,270.01 hmuh a ni tawh a, cheng nuai 7,115.57 hman tawh niin, hmuh leh tur nen cheng nuai 224 vel sum a la awm a ni.