Melriat khawtlang an lungawi lo

Melriat khawtlang chuan an khaw rama 132 KV Power Sub-Station chungchanga an lungawi lohna resolution siamin an puangzar a, Power & Electricity Minister hnenah an thlen bawk.

Melriat khawtlang chuan, 132 KV Power Sub Station, Melriat chu khawtlangin ram an pek avangin August 2006-ah hna thawh ṭan a nih thu leh hna thawh ṭan aṭanga kum 10 ral hnu, December 14, 2016-ah hawn a nih thu an tarlang a; Power Sub-Station aṭanga power an hmuh theih nan khawtlang hruaitute'n vawi tam tak an nawr tawh a, department hotute pawhin power pe turin an lo ṭawng tiam tawh ṭhin tih an sawi.

PE department hotute'n an ṭawng tiam chunga tun thlenga Melriat Sub-Station aṭanga kawlphetha pek an la ni lo chu thinrimthlak an tih thu an tarlang a, "VC leh NGO-te August 10, 2022 zana joint meeting chuan August 2022 ral hmaa ban leh hrui awm sa vek tawh 11Kv aṭanga power supply min pe thei lo a nih chuan he Power Sub-Station-ah hian eng pawh thleng se, sorkar leh department mawh a ni ang," an ti.

Melriat khaw mipui lungawi lohna chungchang hi Melriat VC, YMA, MUP leh MHIP-te chuan nimin khan ziakin Power & Electricity minister R Lalzirliana hnenah an thlen bawk a; an lungawi lohnate hriatthiamsak a, an mamawhte a rang thei ang bera tihhlawhtlinsak ngei turin an ngen a ni.